Hounsla!

Khayaalon se karoon ek sawaal,
Meelon tak itni doori kyon?
Manzil koi dastak de,
Ankahe saare raaz kahe.

Woh meri zidd,
Mera jazba,
Aur junoon.
Jeene ka andaaz woh,
Mar mitne ka khawab bhi woh.

Aisa hi hai woh…
Jigar ke paar,
Jeet ka vaar.
Josh ki lalkaar,
Mann ki pukaar.

Bas aur koi nahi,
Akela woh, akela main.
Hum ladte rahe,
Phir bhi chalte rahe.

Haste haste…
Kabhi woh meri dagar,
Aur main uske nagar.
Aisa mera woh humsafar…
~ Mera Hounsla!

Ishq!

Nazar chura ke tum na dekho,
Jhuki aankhon se tum na muskurao,

Dekho kuch aise…
Khawbon ki haqueeqat dekho.
Khula neela pyaar dekho.

Parindon ki udaan dekho.
Hawa ka jhokha dekho.

Mitti ki khushboo dekho.
Aangan ki pukaar dekho.

Khayaalon ka ehsaas dekho.
Izhaar mein ikraar dekho.

Kabhi toh kehdo,
Yeh ishq hai…

Haan, mujhe ishq hai.
Zubaan-e-ishq ibadaat dekho!

Bhay! – Fear

Maangle tu aaj,
Toofani lambi raat.
Buja de saare deepak,
Umeedon ke dwaar.
Jal gayi rasi,
Par bal na tuta.
Chalta rahe kafila,
Bhay naam hai tera.

Shikanj meri itni,
Koshish karta rahoon.
Joh jung mein hai tu,
Toh vaar main bhi karoon.
Tu bhay hai,
Toh main hosla hoon.
Tu le panaah soch mein,
Toh main dil mein basu.

Tu kamzor bana faislon ko,
Main buland awaaz dil ki.
Dagmagaye kabhi tere paiyr,
Main pathar ki ek lakir.
Sunn yaara apne mann ki,
Sirf andar dil ki.
Bhaga yeh bhay ko,
Mita uske ghar ko.

Jala mashaal roshni ki,
Ujaala kar aashiyaane ko.
Darr ka na koi naam,
Bhala uska kya hai kaam.
Rukna nahi,
Aur zukna nahi.
Maut se aage tu nikal,
Zindagi; silsilon ka…
Keval ek naam hai.

Happy World Poetry Day 21 March

#irshad

Jitni shiddat hai,
Usse tu kho na de…

Jitni shiddat hai,
Usse tu kho na de…

Andheron mein gum si jaaye.

Suna hai ussi mein hai ibbadat.
Sambhale rakh…

Kya pata wahi mera khuda mil jaaye.

Feminism

No boast to praise,
No toast to raise,
I hit a simple truth,
Feminine… I am.
Feminism is me.

The bold individualism.
The attitude in my sleeves.
The mark of silent attention.
The comfort of my jeans.
The scars on my skin.
Allow me to grow thick and thin.

Enthral bold experiences.
Skill thrilling adventures.
Sail mighty endurances.
Toughen gentle resolves.
Perceive grim battles.
Aim me to stand high and tall.

The womb of world,
Calls me names.
Ripping through shuttering eyes,
My feminism cuts barriers ahead.
For new terrains and green plains.

Feminine… I am.
Feminism is me.

Usool – The Principle!

Usool bade bedhangi hai,
Na hai uski jaat.
Kaise kahe badi woh baat,
Kya tum jaano uski kitni aukaat?

Usool bade bedhangi hai,
Kitne lagaye anginat rok.
Mohallon se woh aise guzre,
Apni dagar woh likhte chale.

Usool bade bedhangi hai,
Bin taal ke taan chedte rahe.
Par taalim se jude bane,
Yahan, wahan suron ke saaz lagate gaye.

Usool bade bedhangi hai,
Sanaton mein siskiyaan rote hue.
Toofan ka sanket dete gaye.
Jhujte rahe… par jeet ki kashti paar karte gaye.

Usool bade bedhangi hai,
Mukam ki dorr kheechte hue.
Raah mein faasle badhate chale,
Manzil yunhi fateh paati rahe.

Usool bade bedhangi hai,
Unhe banaye kisne?
Mann ka sawaal bana usool,
Raaz mein jawab de gaya usool.

Oye yaaron…Thoda samjho inhe,
Usool bade bedhangi hai!

 

 

 

Dil kyon rota hai – Tears!

Dil kyon rota hai…
Bebas tu kyon hota hai,
Saala apna hi koi khota hai,
Aansoo tu kyon peeta hai.

Anjaano ka mela hai,
Akela tu kyon sota hai,
Aahat teri sune na koi,
Dard tu kyon sehta hai.

Bheed ki awaaz sunn,
Hawa se khoj na paoon,
Tujh tak kaise pahuchu,
Bheetar se tu kyon bolta hai.

Khaamoshi se baitha hai,
Mehsoos kaise karu,
Dhadkan yunh ruk gayi aise,
Waada tu kyon karta hai.

Dil kyon rota hai…
Bebas tu kyon hota hai,
Jhooth aisa bolta hai,
Pal woh ek dhoka hai,
Tanha mann aaj kehta hai,
Zindagi tera saath chota hai,
Dil tu kyon rota hai!

Chhapak – Inspired by the upcoming movie release of the real life acid attack survivor – Laxmi Aggarwal

Ae musafir…
Ruk zara,
Dekh, yahan…
Thoda wahan bhi…

Aankhen band kar,
Mann ki nazar khol,
Paaoge mujhe,
Meri rooh ko.
Mere ehsaas ko.

Main bani aarzoo,
Main rahoon sach,
Pehchaan mujhe…
Main hoon woh,
Main thodi si ‘Chhapak’.

…Na dekh mera rang,
Na dekh mera roop,
Main pyaari Chhapak,
Keval dekh; mera mann.

Nazar na rakh kayar,
Aankhein na juka sharam si,
Main masoom Chhapak,
Dua kar; zamaana rahe paak.

Andhere ka mooh kaala,
Ujaale pe kyon laga taala,
Main timtimati Chhapak,
Sitaaron sa; mera aashiyana.

Dard ki na koi bhasha,
Satya ki na koi zubaan,
Main adbhut Chhapak,
Insaaf bana; jeevan ka saath.

Phir ek daur aaya,
Hua naya janam,
Mita nishaan kalank ka.
Badal ne bahein kholi,
Hawa ne khuli saans li,
Gun gunati main yunhi boli,
Main thodi si ‘Chhapak’.

Apna time aayega…

Toasting ‘1st anniversary’ to Ad Passions Infinite – 23/01/18 to 23/01/19.

Beedi poori phookh daali,
Chilum bola; bhai apun bhi tere saath,
Yaad mein nikla sirf dhuan.
Saala, Love yeh kaisa,
Apna time aayega…

Katte pe raha intezaar,
Ek…ich pyaali mein apna pyaar,
Socha aayegi aaj toh bahaar.
Saala, Love yeh kaisa,
Apna time aayega…

Lamp-post ki batti gul,
Gully mein andhera full,
Billo rani banegi bijli.
Saala, Love yeh kaisa,
Apna time aayega…

Signal pe dum mara,
Lal, pili dekhta raha,
Hari pe hui gaadi chalu.
Baap, apni toh ho..re..lli hai shuru.
Saala, Love yeh kaisa,
Apna time aayega…

Gateway se banstand tak chala,
Pathar pe naam bhi likh daala,
Issh…strong banegi apni kahaani.
Saala, Love yeh kaisa,
Apna time aayega…

Apni bhi private gaadi,
Neeli batti wali Auto niraali,
Ek…ich seat pe chipke apun dono,
Aaju-baju bajega no pandu.
Saala, Love yeh kaisa,
Apna time aayega…

Gulab pakda haath mein,
Candle light ka booking dhabe pe,
Darling, pyaar se kha toh lo,
Kya tasty…ichh hai chicken masala.
Saala, Love yeh kaisa,
Apna time aayega…

Johri apni ki jeb ke andar,
Anguthi pahuchi ghar ke bheetar,
Maar hi daala mauke pe chouka,
Tu…ich maangta apun ke dil ko.
Saala, Love yeh kaisa,
Apna time aayega…

Shaadi banayegi apne se,
Kholi liya tere waaste,
Einglis medium ki paltan apunki,
Kya banegi tu ab; meri baiko?
Saala, Love yeh kaisa,
Apna time aayega…

Sparsh! – A touch

https://www.youtube.com/watch?v=Jahus_0mysI

Samundar ke tat par,
Aayi ek leher oonchi,
Khaara paani bheega le gayi,
Oof kya tumne mujhe choo aa…
Yeh kaisa sparsh hai tera!

Dooor dooor tak faili,
Ret ki lambi chaadar,
Komal chaav se lipti rahi,
Oof kya tumne mujhe sarahyaa…
Yeh kaisa sparsh hai tera!

Chadhta suraj apni jawaani mein,
Peeli roshni neele amber mein,
Odh lu kesariya rang chunar ka,
Oof kya tumne mujhe bikhraya…
Yeh kaisa sparsh hai tera!

O ri chori, ab sun le mari zara,
Halki muskaan ki meethi hasi hoon main,
Khaamosh zubaan ka alfaz hoon main,
Sulagti aag ki shama hoon main,
Dhadakte dil ki aag hoon main,
Dabe ehsaas ka raaz hoon main,
Rom rom ki pukar hoon main,

Teri rooh mein hoon main tehra,
Meera ke mann ka hoon main basera.
Kisan mein hai tera sparsh,
Tujse hi hoon main,
Mujhse hi hai teri leela,
Main hoon tera sparsh.

 

Website Powered by WordPress.com.

Up ↑

%d bloggers like this: